Прашањето за припадноста во три македонски романи од жени-авторки
THE QUESTION OF BELONGING IN THREE MACEDONIAN NOVELS BY WOMEN WRITERS

Summary/Abstract: Нашето внимание во овој труд е насочено кон три современи романи од македонски писателки: Снегот во Казабланка од Кица Б. Колбе, Скриена камера од Лидија Димковска и Куќичка од Оливера Николова. Главниот лик на првиот роман, младата жена Дина Аспрова го гради својот комплексен идентитет распнат меѓу искуството во европските градови и искуството во родниот град Скопје. Во овој пример можеме да го видиме градот Скопје преку женско око, и тоа е можеби причината зошто чувствувањето на градот е длабоко проникнато со љубовната приказна. Младата интелектуалка Дина, која привремено живее во Фиренца, е принудена да се врати во родниот град за да се грижи за нејзиниот празен семеен стан. Таа го напуштила родниот дом и повеќе од десет години живее повремено во Рим, Париз, Прага и конечно во Фиренца. Клучниот контраст во романот се огледа во односот меѓу европските урбани центри и родното Скопје, при што се поставува прашањето каде всушност се наоѓа домот на Дина? Исто така, романот Скриена камера е роман за номадизмот и патувањата на хероината; нејзините двоумења помеѓу домот и странските земји, или помеѓу сите странски земји што стануваат нејзин дом. Како што вели авторката, најодржливата теоретска платформа за доживување на домот и странската земја ја објаснил романскиот емигрант во Амстердам, Сорин Александреску, кој ги напишал следниве зборови: „Домот веќе не постои, или тој се збиднува на различни места... Бев дома само кога се запрашав дали и каде сум бил дома. Имав идентитет само кога не знаев друга алтернатива. Патот од идентитет до двоен идентитет поминува низ губење на себе, така од дома пристигнувате таму, но секогаш низ различни линии од овде, а во исто време сите се крстосници“. Во третиот роман Куќичка, поимот дом е поврзан со копнежот на главниот лик за љубов и семејна среќа, симболизирана преку нејзината несвесна страст за цртање малечки куќички. Овозможувајќи компаративна презентација на овие три романи, се обидуваме да дадеме коментари за женското разбирање на поимот дом и припадност воопшто.

• Details
• Contents